ليه أما بضحك ببقى حاسس بالوجع
ليه لما بطلع ببقى خايف أني أقع
ليه الدموع جوة عيني بتتحبس
ليه الحياة لسه بيملاها الجشع
ليه الطريق في كل مرة بيتعوج
والصديق مبقاش صديق وليه بتحوج
خايف يادنيا أجي مره وسألك
تقوليلي قلبك ليه بيملاه الطمع
عشمان يادنيا أني اعيش من غير ألم
من غير عذاب من غير أنين من غير ندم
من غير ماحس حد مني بيتخطف
من غير ماتخدي كل حاجة للعدم
أنا عمري عدي ولسة حلمي ماعشتهوش
والفرح فيكي من زمان ماشفتهوش
في كل مرة تقدمي الحزن ليا
وتأجلي الضحكه لية ف كل الوشوش
كان نفسي مره احس بيكي بالأمان
من غير مالأقي الكدب داخل ف الحنان
قلبي الصغير لسة تايه ف الطريق
وف كل مرة بنرمي لومنا ع الزمان
والسكة ليه مبقتش واضحى من بعيد
والأمل خلا السعيد مبقاش سعيد
والجمال مبقتش شيفاه ليه عيوني
كل مافرح ألقى حزنك من جديد
الأماني لسة عايشه ف السكات
والحنين مبقاش حنين بقي حلم مات
والصدف اللي كنا بيها نفرح
خلتنا نبكي ع اللي جاي واللي فات
احمد شمتان
ليست هناك تعليقات:
إرسال تعليق