تعبتيني
ـــــــــــــــــــــــ
تعبتيني معاكي ليه
بحايل فيكي من امبارح
عمال أطبطب وأدادي
واترجي فيكي وأصالح
هوه لازم اشرب البحر
عشان اثبت إنه مالح
بحايل فيكي من امبارح
خلي غرامنا فيه عتاب وحنية
مش كله هجر وعذاب وأسية
وكل شوية تقولي انساني
تعبتي قلبي ولساني
ماهو الغرام مش كله ملام
فيه عتاب وملاغيه
مش لازم اشرب البحركله
عشان أثبت إنه مالح
بحايل فيكي من امبارح
ليه كل حبك هجر وصد
دالحب ياروحي هات وخد
حبة عليا حبة عليكي
مش كله هجر وكله بعد
خلي فيه مرونة وليونه
تعبتيني معاكي بجد
مش لازم اشرب البحر كله
عشان أثبت إنه مالح
بحايل فيكي من امبارح
قربي مني واسألي عني
واسكني قلبي وعيشي جواه
وحياة قلبي ياروحي وقلبي
قربك هوه اللي اتمناه
كفايه بقي هجر وأسية
خلي فيه حبة ملاغية
من امبارح وانا بتحايل
وعمال أدادي وأصالح
بحايل فيكي من امبارح
ـــــــــــــــــــــــــــــــــــ
شعر /السيد حماد
ليست هناك تعليقات:
إرسال تعليق