غربة الروح للشاعر حسن السحماوي

 أنا الدرويش ..!!

( غربة الروح )

..........

الغربة مش عيبه ..

العيبه إنك تبقى وسط الناس وحيد

عايش مابين نفسك .. ونفسك ماهش سمعاك

جواك أمل ساقط .. من سنين العمر ..

والصبر حنضل من زمانى المر ..

يسقينى كاسى .. من خمر انفاسى ..

بيتوه ويرجع والخبر .. مايسر .. ..

.......

دواوين حروفى المترصصه

من نبض إحساسى ..

متعلقه فى حروفك التنهيده  ماتخليش

وكم نهار يبتدى .. وكم نهار .. مايجيش

بس اللى باقى من حروفى كلام

زى اللى تاهت روحه فى التهميش

يا حلمنا المغلوب على أمره 

 أنا الدرويش ..!

مملوك لغيرى فى حرف يسبقنى

.. ولفين طريقى أنا ..

 أنا اصلى موصلنيش  .. 

سيبوا ابتسامتى .. جوه منى تعيش

متونسه روحى .. فى حلم ماتحققش

......

وفى حضرة المكتوب ..

 مبوسط لأنى لقيتنى جواكم ..

كنت الحقيقة الصح فى هواكم ..

بس النهاردة .. لقتنى حلم مافيش

مش عارف أمتى حاكون .. مع نفسى .

يا محنين كف القدر بالروح .

الروح تروح فيكم لجل ماحاتعيش

قلبى فى هواكم داب .. وأنا مخبى

جوايا صمت الدنيا .. مايكفيش ..

......

صبرى اللى ضاع منى  

وضيع لى محبوبى .

هز الهلال يا مودعين الحرف ..

مش بالكلام .. حايخففوا ذنوبى ..

وأنا أصلى رافض جوه منى حروف ..

بتحس طعم الهجر من حدود الشوف .

بس الحقيقة الصح فى حياتى ..

أنا المفتح وعايش دنيتى .. مابشوف ..

شمس النهار الحارقة فى دموعى ..

والليل نجوم بتتوه مابين جذب السما للروح ..

طلع النهار .. ولسه الحلم مش مألوف ..

وانا لسه رغم وجودى جواكم ..

نبضى  بيعزف لحن مش معروف !

.................... شعر ..

حسن السحماوى ..