قولوا لولادنا
...........
الخوف نبت أشواك ف ارواحنا
تقاوي زرعتهم حرام × حرام..
الشوك غرز وبيسري ف جراحنا
والصرخة بدوي ترش آلام.........
عبوا ف عقولنا الغولة والعنقاء
وخوفونا الضلمة والمارد......
بالكدب حلفوا يمين بعقد الهاء..
واوهمونا الصيف مناخ بارد.....
من كتر خوفنا اتبل مطرحنا
لا شمس هتنشف ولا هنام...
وازاي ننام والجوع ف ارواحنا....
ولا حد ماسك من أموره زمام
قولوا لولادنا اللمة ف العيلة
دا عمر تاني لعمرنا بينضاف
سهراية حلوة تخفف الشيلة
ولقمة تجمعنا ولوعيش حاف
مافيش يا واد عنقاء ولا غولة
ولا دعم هيخفف هموم الناس
الخوف وجعنا وقلل الحيلة....
ما فضلش غير ان الجزم تتباس
سوق النخاسة ما عدش له عازة
عبيد بنخدم لجل لقمة عيش
ممكن نعبي عرقنا ف قزازة
نغسل به توبنا اللي اتنسج م الخيش
قولول لولادنا يشدوا خيط الشمس
من فجر بيشقشق مع العصافير......
ويغيروا صوت الغراب للهمس........
ويعلموا الاحلام فنون الطير...........
بقلمي
ناهد الموجي
شاعرة مصرية
ليست هناك تعليقات:
إرسال تعليق