//////+++المعروفة بلوشام+++//////
واش نسينا امي حادة
ديك شريفة جاية غادة
حادة لمدجة وداك شمار
مولات الحايك مولات الدار
مولات لوشام بين العينين
لعبادة الهيدورة والدين
دبليج فيديها ظاهر يسطع
حنة كحلة حمرة تلمع
تنخض الشكوة في عمق الليل
تعجن الخبز على ضو القنديل
تجلب لبقيرات تشربنا
من الماعز ناقة تروينا
وترافقنا للبير تورد
وعلى ناس لوالة تعدد
ديك للي قالت لكلام سالة
ازمان هذا تغيرت الحالة
معدودة ليام و مقهورة
دابا دور دورة والصورة
ياولادي ماتت سرار حشمة
نتسناو من ربي الرحمة
حادة قادة ماتعرف عفن
وا مولات الزبدة وسمن
لتكلمت مولات لحناني
بوحها لغاز وشلى معاني
كانت زينة كل جمايع
كان حس لمة معاها طايع
اثربي وتكبر لحفاد
وحنانها اتعرفو لعباد
تجمع لحطب تزند به النار
مسكينة حادة ماعندها خثيار
طول نهارها عايشة لثعاب
ف الليل سهرانة في لعداب
هذا حالها لالة حادة
ماعندها راحة لا سعادة
وا فين ناسنا وديال بكري
وانا للي شفتهم بعين عمري
وا حادة المعروفة بلوشام
امشات سافرت وكمل لكلام
بقلم صقر الحروف الزجال المحجوب بوسبولة
قصة حية من ناس زمان
ليست هناك تعليقات:
إرسال تعليق