( إنت مين )
بيقولولي إنت بالنسبالها مين؟؟؟
(قولت أنا)
حاجه عايشه جوه منها من سنين...
أنا اللهفه.. أنا الرأفة..
أنا الشوق والحنين...
أنا الهين ..أنا اللين..
أنا القلب الحنين.. والمتين...
أنا الدمعه إللي بتعاند...
وتطلع ضحك في عنيها..
وتتحول طلاسم حب...
أنا بلسم شفا للقلب...
أنا النني إللي جوه العين.
أنا العشق إللي بيصونها ...
أو النور إللي في جفونها...
أنا إللي الإتنين.
أنا الخوف إللي طمنها...
أنا اللوحه إللي إبداعي مزينها...
أنا الرسام وأنا الألوان...
أنا الفكره وأنا الفنان...
وإحساسي وأنفاسي إللي راسمنها...
أنا التابلوه وأنا الناس إللي ليه بصين...
أنا الدرع إللي يحرسها من الأعداء ...
أنا الحرب إللي قدامها بتبقي دعاء...
وعلي إحساسها ببقي أمين.
أنا الروح إللي ساكناها منين ماتروح...
أنا الحظر إللي بتعيشه بحريه...
أنا الممنوع في تفاصيلها وأنا المسموح...
ولا طوارئ بتمنعني ولا قوانين.
أنا إللي عملت لحياتي...
عشانها إقامه جبريه...
عشان تقدر تعيش هيا...
واسيب قلبي في غرامها سجين.
أنا المسكين...
وأنا إللي في عشقي أسطوري...
وبساتيني زهور جوري...
وعطر في سحر لمساتها...
في دقاتها ورود ياسمين...
أنا مغوار جيوش شوقها...
وأنا الدم إللي في عروقها...
ومعشوقها...
أنا الأسد إللي في زئيره...
طوفان تأبين...
وعلي أسوار حصون طيفها...
كتبت عباره من صمتي...
ممنوع تقرب من كيانها...
ممنوعه حتي فكرة التصوير...
حتي لو تخمين.
أنا إللي بعيش عشان أسعد جوانبها...
ما أنا حبيبها...
وأنا إللي معاها مش اسيبها...
ليوم الدين.
عصام السعدني...
ليست هناك تعليقات:
إرسال تعليق