جوة عيني
ــــــــــــــــــــــــــ
لو بصيتي يوم في عيني
وشوفتي صورتك
إعرفي إنك ساكنة فيها
مش مجرد حتة مراية
بصيتي فيها
وعكست علي صفحتها صورتك
إعرفي إنك لوحدك
اللي عليها غمضت جفني
واللي شايلها
جوة جوة النيني
ومحدش فيها شاركك
علشان إيه؟
علشان بحبك
علشان عشقت قربك
ولا اتحملش بعدك
جوة عيني سكنتك
جوة قلبي خبيتك
وكتمت حبك
خوفت بعدك
خوفت هجرك
خفت حد تاني
مني ياخدك
يتنعم بعبيرك
ويقطف ورد خدك
او يسكر من خمرة
ثغرك
او يسكن جوة حضنك
او حتي طيفه يزورك
لو بالخطأ في نومك
عاوز اكون لوحدي
جوة حلمك
مش عايز غيري يشوفك
أو حتي يلمح طيفك
لاني ليكي وحدك
ولا يوم اكون لغيرك
عاوزك تكوني ليا وحدي
علشان كدة سكنتك
جوة عيني
وف قلبي خبيتك
أيوة أناني
وكمان بغير
عليكي وحدك
عشان بحبك
وان ماغرتش أبقي حقير
وانتي في قلبي أميرة
واللي يستاهلك أمير
وانا علي عرش قلبك
أمير أمير أمير
بحبي وغيرتي وحرصي
أمير
وانتي اميرتي
اللي عليها بغير
علشان كدة
جوة قلبي خبيتك
وجوة عيني سكنتك
وبجفن عيني غطيتك
وغزلت من رموشي
فرشك ونيمتك
فرش انعم م الحرير
ياللي في قلبي أميره
وانا بحبك أمير
ـــــــــــــــــــــ
شعر/السيدحماد
ليست هناك تعليقات:
إرسال تعليق