ف عينيكِ بدوب مليون مرة
ف عينيكِ دِوَل ملهاش قارة
ف عينيكِ وطن وف حضنه بعيش
ولا عمري بفارقه ولا مرة
........
ف عينيكِ جمال بيفرّق سحر
ف عينيكِ صفاء ولا موج البحر
وانا قلبي بنظرة مات مدبوح
إتمنى يكون بايديكِ النحر!
.........
وشفايفك دول تمثال في مزاد
وعطاه راح يرسي عليَّ وبس
وهجيبلك كل ورود بغداد
واعمل لشفايفك حفلة عُرس!
........
والعود متفصل قوي مرسوم
وكأن جمال الكون مقسوم
النص لكل بنات الكون
والنص التاني ليكِ محسوم
.......
وف صوتك رقة تفوق الوصف
او زي جيتار فنان ف العزف
بيطبطب جدا على قلبي
ويحطه ف اول دور ف الصف
.........
وخدودك نور من حضن صباح
وكراسي ف تعبي عليها ارتاح
والشامة بترقص على خدك
بتخلي قانون المنع مُباح!
........
وانا واهب ليكِ حروف العشق
وجامعلك كل آيات الصدق
فاختاري مابين الرد بأه
ومابين الرفض بكلمة لأ
#سميرمحمود
ليست هناك تعليقات:
إرسال تعليق