قصيدة رثاء مهداه إلى صديقي العزيز HAMDYHsultan اللهم أغفر لجميع موتى المسلمين وبارك لنا في أباءنا وأمهاتنا
بعنوان /ابويا
أبويا يا سندي وضهري
وأهلى وشمسي وضلي
من بعدك أتكسر ضهري
ومين بعدك يا أبا فضلي
يا أبويا ياروحي اللي ساكنة التراب
كترت جروحي وطالعة روحي م يوم الغياب
وقل شغفي و طموحي وحب الحياة
يا أحزاني نوحي وفوحي وزيدي يا أه
راح اللي كان بيطبطب وغاب
َوراحت الفرحة ودفنت وياه
وبقيتي سنيني سوده وهباب
وغابت السعادة وراحت معاه
راح اللي كان بيطيب جروحي
وخده معاه قلبي ورحي
وسابني بعده أعيش المعاناة
يا ألف خسارة على الفرحة
اللي جوايا دبلت ودابت
والضحكة لبست طرحة
والدموع جمرات وسايحة
وفعيونى سكنت وباتت
وفاتت الأيام وكبرت يا أبا
والمرض قعدك وهدك
دا أنت كنت أسد ف غابه
وماحدش يقدر يصدك
يا حبيب كل الغلابا
وما تملكش حتى اللي فيدك
وأتعلمت على أيديك الطيابة
وبحنانك زرعت فيا حبك
هان عليك تفارقني يا أبا
وقدرت تفارق يدي يدك
هان عليك تحرمني حضنك
ومالحقتش أشبع منك وأضمك
يارتني كنت خيط ف طرف كمك
فضل ملازمك لأخر أنفاسك
أبويا يا طيب يا زينة الرجال
يا قلبي القريب وجد العيال
طول عمر كبير أهلك وناسك
وقلبك كبير وعقلك أساسك
كان نفسى أودعك وأبوس رأسك
وأقولك سامحني يا أبا ع الغياب
وأكدب وأبرر وأدور على أسباب
مع أنك عارفني وكشافني وشايفنى
ومش عايز تكسفني قدام الأغراب
وناح الغراب والروح طلعت للوهاب
يا حياتنا اللي بقيت بعدك خراب
وقلبي اللي فاق للأسف متأخر
وتاه مع الأشواق وعرف انه قصر
ربنا يغفر لك وبخاطرك يجبر
ونتقابل ف جنه الخلاق
وروحك معانا ودايما بتحضر
كلمات وأشعار إسماعيل البلبوشى
أهداء إلى صديقي العزيزHamdyHSutan
ليست هناك تعليقات:
إرسال تعليق