/////////+++يالمرساوية+++/////////
عبدة ياكاملة مكمولة
ياقوافي ياسرار النعمة
يابسمة دايمة مقبولة
ياسحر حياتي يانغمة
وحلوة خضرة وحقولة
وقبايلك اسرار البسمة
منك دفء لمحبة فايح
يامغردة ف يام زمانك
والحسن في ظلك ياك سايح
مشمول ياعبدة بحنانك
مقصودة وانا مارايح
ياجالباني بسر حضانك
يالعاطفة بالحب مشهورة
ياعبدة يالمرساوية
زينة لالة باهية الصورة
وعشقتك يالعيطاوية
قلب كبير مسرورة
ياسحرية ذهباوية
يكفينا ماسمعنا منك
انت للي غنيتي ف زمان
والعيطة هيبة من عندك
يامن رسمت حروف العنوان
كلشي يالالة من جودك
يانغمة وبسمة لطمئنان
خربوشة ومكلمة حزانك
متحدية كل طاغي حبار
خربوشة وراكبة سر عنانك
ناس سامعة بكاك وسط النار
ياخربوشة وسط كرانك
قصة ورواية ليل ونهار
انت الغالية يالعبدية
غيوانية ممنوحة
يالبحراوية بالنية
يامداوية عمق المجروحة
وانت اللؤلوءة سحرية
يالعيطاوية مسموحة
خليك ياعبدة كيف انتي
امراية الماضي والحاضر
خربوشة لكل الاتي
مازال لالة صوتها جاهر
ف حياة هذا وداك وحياتي
ياللي ف لب خيالنا ظاهر
انها عبدة الجميلة جارة دكالة الجميلة
بقلم صقر الحروف الزجال المحجوب بوسبولة
ليست هناك تعليقات:
إرسال تعليق