( وأشكي لمين )
رغم الجروح وقلبي المجروح
الله يسامحك سيبني لحالي وروح
وع العموم كل الهموم خبيتها جوايا
وهنسي سيرتك وأي ذكري ليك معايا
وقدام الناس هرسم علي وشي ضحكتي
ورغم الألم اللي سببتهولي مش هبين دمعتي
غدار يازمان غدار نحب وآخرتها ليه مرار
وليه نندم ع اللي فات ونبكي عليه ليل ونهار
اقرب الناس ليا زي كل الناس غدر بيا
ظلمني وكل حاجه حلوه بينا نسيها ليا
ويالف خساره لما المال يغير النفوس والحال
ويسرق مننا سنين عمرنا وراحة البال
أقول ايه ولاَّ ايه وأشكي لمين
الكلام مابقالوا معني لما راحت احلي سنين
يا اللي ضميرك مات ونسيت قد ايه اتحملت معاك
وع الحلوه والمره اصعب ايام عيشتها وياك
ولما جالك المال غير حالك وبعت احبابك
وزي ماغدرت بيا بكره هيجرالك
وبعد سنين الصبر والوفا آخرتها عذاب
ومهما قولت من كلام من النهارده خلص العتاب
وغريبه يآ احوال البشر لما الحب يوجعنا من غير اسباب
كنت عايشيه راضيه بحالي لحد ماسرقت ايامي
ظلمتني وانا اللي اديتك شبابي وحلمي ضاع قدامي
غدرك كسر ضهري وخلاني ندمانه علي سنين صبري
مكتوب عليا اوفي واخلص واخسر سنين عمري
لما كنت فقير كنت باحس معاك بالحنيه
ولما جالك المال قسيت واستخسرت الفرحه فيا
افعالك معايا وقلة اصلك زادت جوايا الوجع والألم
والأصيل مايغيره الزمان ولا المال ولا يغدر مهما اتظلم
خواطر ( اشرف الدغيدي )
حقوق الملكية محفوظه
ليست هناك تعليقات:
إرسال تعليق