قصيدة (دنيا جديدة)
شعر ولاء حجازى
وفارقت البيت اللي بحبه
علي بلدى اللي أنا معرفهاش
ودعت الماضي مع حيرته
علي دنيا جديدة لازم تتعاش
وبجد البيت راح يوحشنى
والشارع وجيران حوالينا
ما أهى رحلة عمرى وحياتى
ف البيت ده أجمل ليالينا
و يا عالم ايه زمانى مخبي
علي فين راح ترسي مراسينا
ونلف الكون وأهى دايرة
عمالة تدوور قوى بينا
وأهى ذكرى محفورة ف قلبي
من كل مكان عاش فينا
أولها مدينتى المطرية
وطفولتي وأنا لسة شقية
وصديقتى الغالية فريدة
كات أجمل صحبة ف عنيا
وتانيها المنزلة بلدى
وأصحابي فيها ومدرستى
ودروسي بقي و يا دراستى
أيام مين راح ينساها
لو مهما بعدنا وفارقنا
فقلوبنا دايما فاكراها
دنيانا غريبة بطبيعتها
تايهين والدنيا متاهة
وآدى حال الأيام بينا
بنقابل ياما وبنفارق
مين فاضل لسة ويانا
ومين فينا للتانى مفارق
أيام بتشكل وجدانا
والدنيا دى توهة ومفارق
نتعلم من كل ما فاتنا
ويارب نكون شئ فارق
وآدى دنيا جديدة وبعيشها
وياعالم مين تانى هفارق
ما ناقصنا وجوده فحياتنا
من بدرى ودعنا وفارق
ما أهو ابويا ساكن هنا بيتنا
وإن غاب جوانا ما فارق
#الشاعرةولاءحجازى
ليست هناك تعليقات:
إرسال تعليق