" الأراجوز "
#الشاعر_وليد_راغب
الأراجوز
لما بيبكى كله يوسع
لأن كلامه أكيد راح يوجع
الأراجوز
لو مايضَحكشِ مايبَكيش
لو ماصاحبشِ مابيأذيش
وغصبٍ عنه طريقته هاتلسع
يا خساره الأراجوز بقى زعلان
بكره هاينسى أكيد غلبان
بكره هايرجع تانى ويضحك.. ويضحكنا
بكره هايرجع تانى يغمى عنيه
بكره هانضحك تانى عليه
بكره ده ايه..
هو امبارح.. ممكن نصحى فى مره عليه
الأراجوز مابقاش فرحان
مابقاش شايف بالالوان
مابقاش عايز يجرى ويلعب
لأن ضرورى الحال اتشقلب
تضرب تقلب
والأراجوز
كل ما يضحك يصبح أغلب
مابيصعبش عليه الناس
ماهى ايامه دايما أصعب
كان بيضحكهم
فاكر نفسه لذيذ أو شهم
واول لما زاد الهم
كله اتفركش
اصله مكشر
يبقى ازاى الناس تتلم
وهو ده عقل
كل معارفك حتى حبايبك
حتى الأهل
كله هايبعد ويروح أبعد
وانت هاتسكت يُتم بيُتم
وان حتى فى مره يشاوروا عليك
هايقولوا فى داهيه جتك الغم
وماحدش فاهم فى الأراجوز
غير خشبه تدارى فى بلاويه
وضحكه وكلمه و١٠٠ إفيه
وكلمه فى حدوته
ماضحكش عليهم ضحكوا عليه
الأراجوز
فى ظروفه الصعبه
أوعى فى مره حد يناغشه
ماهو مش بلياتشو وداهن وشه
الأراجوز علشان انسان
بيطبطب جامد ع الغلبان
ويحس بتعب التعبان
بيحس بغيره فى مشاكله
ويخبى فى وشه الزعلان
وعشان انسان
ممكن مره الحزن يبان
فكله يلومه
بقى أراجوز وكمان زعلان
كله بينسى..
قلب الأراجوز الانسان
الأراجوز
هو الجد ياعم بجد
يقدر يسند مليون حد
يفرق جدا ويا الناس
وتفرق برضه معاه الناس
ووقت الجد
لما يحس الخيبه بجد
مابيفرقش معاه ولا حد
بيطلع عادى بره الخشبه
ويبطل يرمى الإفيه
بيبطل عادى يغمى عنيه
ومايشوفش الناس من حواليه
الكل استغرب
قال ايه.. فيه ايه
الأراجوز مابقاش بيضحك كده ليه
الأراجوز علشان انسان
ماضحكش عليهم
ضحكوا عليه
ليست هناك تعليقات:
إرسال تعليق