...(...الدنيا نصيب...)...
.......................... عوني هشام
======================
الدنيا نصيب مليانه اقدار
بتدخل دار وتسيب كام دار
ونصيبك بس رح يصيبك
لو حتى جريت فوق ١٠٠ مشوار
مشاوير فى الدنيا نتوه فيها
وان جاتك الخطوه امسك بيها
لو حتى بطوبه روح ابنيها
دى اقل نوايه تعليِ جدار
بكفايه هزار وامسك فى الجد
بالعزم هتوصل يوم للمجد
ان جالك السيل خد حرفك سد
وبعقلك ركز فى الافكار
افكار ومواقف ياما كتير
طب صفي النيه وروح للخير
قوم طور نفسك بالتغير
بالحكمه تعيش فى الناس بوقار
لو فلاح قوم سلم على الارض
وارسم ف خطوطها بطول او عرض
دى سقايه الغيط على كتفك فرض
هتلاقي البذره الناشفه خَضار
ان كان ابوك عايش بوس ايده
وان ساب عكازة اسند ايده
ان مالت الدنيا اوع تسيبه
دى عقوق الاب تودى النار
استغفر ربك مسا وصباح
هتلاقي القلب مافيهش جراح
ونصيبك ينده وبالحاح
ماهي دنيا ملانه بالاسرار
اسرارك اوع تقولها لحد
ركز فى اليوم فكر فى الغد
وان كانت اصحابك ملهلش عد
تبقى انت النسمه . في يوم جه حار
عيش ويا احبابك بالاحساس
سيبك م الظن او الوسواس
هاتعيش فى محيطك عالي الراس
بكلام هاتحسه الناس اشعار
اقدارنا بتيجي بدون ترتيب
ولكل واحد منها نصيب
مرات فرحه ومرات بتخيب
والمؤمن بلوته تطفي النار
الرزق عمرة ماكان بالمال
ممكن بالصحة وراحة البال
سبحانه مغير فى الاحوال
وكل شئ عنده بمقدار
اياك تركن وتقول يانصيب
عرقك ده بس هايملا الجيب
الرزق ياسيدى فى علوم الغيب
مع توبه وزيادة الاستغفار
.....................
////// عوني هشام
ليست هناك تعليقات:
إرسال تعليق