اللى بيحبك يصونك
يبقى نور ساكن عيونك
اللى بيحبك يهاودك
لما يظهر فيكى جنونك
يبقى فرحك لما تحزنى
لما كل الناس تخونك
اللى بيحبك يضمك
ولما تتكسرى يلمك
تبقى حاسة أنه دمك
اللى بيحبك يشيلك
تندهيله على طول يجيلك
يبقى عطشان من سبيلك
ممكنه من مستحيلك
تلقى دمعه سلسبيلك
يمسح الأحزان بكُمك
اللي بيحبك يحاوطك
يبقى مستحمل قساوتك
يبقى فاهم أمنياتك
إيه بتتمنيه ف حياتك
جاف يقاوم استيكاتك
حضنه يشبه حضن امك
اللي بيحبك مرايتك
انتى غايته وهو غايتك
يبقى حتة من حكايتك
يعنى فاهمك من كلامك
من ملامحك وابتسامتك
واما تكتر فيكى الامك
يبقى متغرب بدونك
اللى بيحبك يشِّدك
لما تبقى وحيدة ضعيفة
يبقى اجمل حاجة عايشة
لما كل الكون سخيف
شخص لجل عيونك أنتى
مستعد يعيش كفيف
شوفى بقا مين اللى حبك
مين بيرهن عمره جنبك
أن لقيتيه بجد حبك
قولى له كان الله ف عونك
#محسن_الريطى
ليست هناك تعليقات:
إرسال تعليق