جلد العتمه ..الشاعرة .. إيزيس غانم ..

والليل بيدوس...
على خدّ النور ...
بحذاءه الإسود وبيخرم ..
عين الشمس بدبوس ..
علشان خفافيش الضلمه تعدّى ...
وتسكّن ف نفوس الخلق كابوس ..
ظهرت من جلد العتمه
عجوزة ف إيدها فانوس...
ورا منها إتنين شايلين صندوق..
منحوت على عضمة العاج ..
جعران..وغراب...
وحنش أجرب على صدر الباب ..
محفور على ديله المنحوس ..
السوس ....للسوس..!!
ويشق البحر حصان أبنوس...
شايل على ضهرة هاروت ..وماروت ..
شايل مملكة السحر الإسود..
شايل ...موت...!!!
وكأن إيزيس ...
بعد ما لمّت أشلاء أوزوريس
ف تابوت الفرعون الطيب ..
وإتحدت ..بفانوسها الشمع
المتحصن من نار إبليس ...
إتحدّت بالشمع وعدّت..
من جلد العتمه ..
وادى الأشباح بتابوت أوزوريس..
إتفاجئت ....
بغصون القمح الدبلانه ..
والشجر المدبوح...
النازف دم غصونه ..
سبايك غلّه ...وروح..!!
روح الإنسان ..
روح الفلاح المتعرى ..
الناسج عرقه ...هدومه..!!
بالفاس الباكيه ..
بالأرض الشاكيه ...
بالثورة اللى اتسرقت
من إيد الطفل ...
الطفل اللى بدمه ..
نبّت أشجار الضّل..
بس الضل ..ف عتامة خفافيش العتمه ..
مبقاش ضلّ..!!
والكل ..اللى إتجمّع ف الواحد..
مبقاش ..كل..!!
ولإمتى يا مصر ...
تينك وزتونك للأسياد..؟
والعبد الراكع فوق طينك
بنقاء الفطرة ..بقى م الأوغاد..
مع إن ولادك وضوكى ..
وبميّة نيلك غسلوكى
من كل فساد..!!
ف إزاى يا إيزيس ..؟
حورس يستشهد علشانك..
ويخضّر أوراق أغصانك ..
وتسيبى السوس ينخر عضمك
ف صلاة العصر ..؟؟
قدامك طريقين ....
يا تعودى لصلاة الفجر ..
وتصلى الفجر ..!!
يا تسيبى الشياطين ف مسامعك
تدّن فتنه ..وتسبّح سحر ...!!
فوقى يا مصر ..فوقى يا مصر ..فوقى يا مصر...
.............................................................
قصيدة \\ جلد العتمه ..
من ديوانى الاول
إيزيس غانم ..