سوق البشر ..بقلم ..الشاعر / سيد صادق.

سوق البشر مليان ..
اشكال علي الوان ..
كله بياكل كله ..
حتي ولو شبعان !!
عايشين عالم وربنا عالم
فيه الطيب مات م الظالم
ولو عايش بينا جدنا ادم
كان اتحسر ع الإنسان !!!!!

ناس مﻻعين عايشين فاكرين
هيعيشوا فيها ليوم الدين ..
وﻻ ف دماغهم رد الحق
وناس تعبانه طافحه الكوته
راضيه وعايشه بالفتفوته ..
صابره وشايله ما قالت لأ ..
ناس بالطيبه جت معجونه ..
وناس احﻻمها بقت مدفونه ..
وصوابعها دابت ف الشق ..
وناس تصحي و يومها يفوت ..
من غير حتي ما تعمل صوت
عايشه حياتها كده بالزء

ناس علي ناس تتك تدوس
وناس تشتري وتبيع ف نفوس
ودايما دايما بتقول عادي ..
وناس عايشه كده ع الجنب
وناس تعملك مليون ذنب
وتقول ربك هو الهادي
ناس تلبسلك مليون وش
وناس لو هتاكلها ب مش
ﻻ بتتطاطي وﻻ بتدادي
ناس عايشها تخوض ف العرض
وناس بالعكس تصلي الفرض
مع ان القبله الناحيه دي

سيد صادق