أسرار ... بقلم الشاعر / أحمد طلبــه .

أسرار
=======
لا كل حاجه مخبينها
في قلبنا تتقال
ولا كل حاجه نقدر نقولها
مهما كان الحال

أسرار كتير موجوده فينا
عمرها ماتبان
واللي يبان ضحكه بعينينا
تداري حمل جبال

🥀🥀🥀🥀🥀

يا وجع القلب علي عمري
اللي بيروح مني مش لاقياه
وانا مغلوبة علي أمري
وحتي الفرح مش حساه

لا حب العمر صان خيري
دا شاف أحلامه مع غيري
دي حاجه واجعه تفكيري
عشان مابقتش فارقه معاه

دموعي في عيني مطرحها
وايدي بس تمسحها
أنا لو حد يجرحها
لخاطر الله أنا مسمحاه

يا وجع القلب علي عمري
اللي بيروح مني مش لاقياه
وانا مغلوبة علي أمري
وحتي الفرح مش حساه
==================
كتير أسراري بداريها
ولا حد عارف بيها
ومين بالخلق بإيديها
تزيح همي اللي أنا شايلاه

ما أنا اللي الحزن بيعشها
دا رغم الضحكه بوشوشها
تداري خوفها آه بجفوفها
ودا نصيبي وانا قبلاه

ومش عايزه بإني ابوح
لحد من اللي أنا كتماه
مجرد حاله بكره تروح
وهتقابل دي وجه الله

يا وجع القلب علي عمري
اللي بيروح مني مش لاقياه
وانا مغلوبة علي أمري
وحتي الفرح مش حساه
=================
احمد طلبه