تمت مشاركة منشور من قبل Reda Montaser.
عضو جديد
السبع بنات ..رواية /رضا الحسيني ج1( الحلقة1)
_ اصحى ياحاج السمس طلعت .. صباح الخير
_ صباح الخير .. إيه .. أنا اتأخرت إزاي كده في النوم النهاردة
_ لقيتك نايم تعبان قلت أسيبك شوية ..لازم ترتاح ياحاج
_ مش متعود ماانتي عارفة عالراحة .. البنات صحيوا
_ أديني بصحًيهم أهو .. قوم بس انت اتوضا وصلي يلا
_ ياااه .. فعلا جسمي متكَسر قوي .. ياقوي
_ على مهلك ياحاج .. بالراحة على نفسك ياخويا
.. يلا ياحكمت صحي اخواتك .. وسيبك من شعرك ده شوية
_ حاضر أديني بصحيهم أهو .. قومي يانهى .. اصحي ياست زينب .. يلا ياوزة .. اصحوا بقى مش بتشبعوا نوم ؟!
.. ياماما تعالي شوفيلك حل فيهم مش عاوزين يصحوا
_ إيه ياحكمت الزيطة دي ياختي اللي عالصبح .. فيه إيه
_ طب قولي صباح الخير ياست نور
_ أنا يا أبلة حكمت هقولك صباح الفل ياأحلى أخت إنتي
_ ياسلام على لسانك الحلو يافريدة ياروح قلبي .. هاتي بقى بوسة حلوة ياعسل إنتي
.. وصحًي بقى مفيدة وياكي .. ماما من بدري عاوزانا نصحى كلنا يلا
_ خير فيه إيه النهاردة ياحكمت؟!
_ لسه مش عارفة .. أنا زيكم مش فاهمة ليه
_ مش عارفين إن بابا بيحب يفطر ويايا قبل ما ينزل للمحل
_ لا يافريدة يافالحة مش عشان كده أكيد .. حاسة فيه حاجة تانية
_ ممكن برضو يانهى
... وصرنا جميعا ككل يوم نتشارك في تجهيز الفطار وأمنا تجلس بالصالة على الكنبة كعادتها .. صارت حركتها أصعب من الأول .. ووزنها يزداد مع الوقت .. كما تزداد طيبتها وضحكتها الجميلة .. ويزداد حبها لنا .. لم نعرف يوما منها تفريق لنا في المعاملة .. فقط أنا كنت عندها الأغلى .. كنت الأكبر.. وعشت معها وأبي سنواتنا الأولى .. حينها كنا نعيش بمنتهى البساطة وكان بيتنا دورا واحدا قبل تعليته ليصبح دورين هكذا,,
_ إيه ياحكمت مالك يابنتي .. سرحتي في إيه كل ده .. مدي إيدك يلا بسم الله
_ حاضر ياأمي هاكل أهو .. لمتنا دي أحلى حاجة الصبحية
_ ربنا مايحرمني من لمتكم معايا كده أبدا يابنات
_ يارب يا أبويا .. ولايحرمنا من وجودك وسطينا
_ صحيتنا ليه بقى بدري يا بابا يلا اعترف بسرعة
_ بس يامقرودة إنتي .. على طول كده مسحوبة من لسانك ياست فريدة
_ دي عسولتي سيبيها يانور براحتها
_ ياسلام عليك يابابا يانصير الغلابة اللي زي
_ إنتي غلبانة إنتي ههههه
_ أيوة ياأبلة نهى غلبانة ونص اسألو بابا
_ النهاردة جايلنا ضيوف على بعد المغرب كده
_ ضيوف مين ياأبويا .. حد من قرايبنا
_ لا يا حكمت يابنتي .. جايلنا ناس جيرانا .. وحاسس كده جايين بالخير
_ أنا شامة ريحة جواز يابابا
_ ربنا يسهل يانور يابنتي .. بيتنا ماشاء الله مليان بالعرايس .. هو فيه في الدنيا كلها بنات حلوين زيكم
_ هما لمحولك بحاجة ياحاج
_ أيوه ياحاجة فهمت منهم جايين يطلبوا بنت من بناتنا
_ طبعا جايين يطلبوني أنا يابابا صح ههههه
_ صح ياغلاباوية هيريحونا منك يامقرودة
_ أيوة يا أم لسان طويل
_ ياعالم ياحبيبة قلبي يوم جوازك هكون عايش ولا لا ..
_ ماتقولش كده ياأبويا .. ربنا يديلك الصحة وطولة العمر
_ إيه ياحاج الكلام ده .. ربنا يخليك لينا .. وتفرح بيهم كلهم
_ كان نفسي يبقى عندي ولد يشيل معايا ومن بعدي ويخلي باله من إخواته البنات
_ ماإحنا كلنا جمبك أهو ياأبويا .. ماتشيلش هم حد فينا أبدا
_ أنا يابابا ولدك ولاتزعل ههههههه هاتلي انت بس قميص وبنطلون
_ شوف البت المقرودة ولسانها
_ تعالي في حضني تعالي ماحدش فيكم يزعلها أبدا لوبتحبوني يانهى إنتي واخواتك
_ حضن وبوسة لأجدع بابا هههههه اتغااااظوا بقى
.. ونزل أبي للمحل ككل يوم تصحبه دعوات أمي المعتادة وقبلات ست فريدة المفعوصة .. وساورني إحساس بإني أنا العروسة ..وتذكرت وديع ابن جيرانا اللي كان في الرايحة والجاية بيبص لي ويبتسم
_ حكمت .. حكمت .. تفتكري العريس اللي جاي ده جاي عشان مين فينا .. كان فيه مهندس مرة اتخانقت وياه قدام البيت ويومها بصلي كده وسكت .. ولقيته تاني يوم واقف قصاد بيتنا على الناحية التانية في نفس الميعاد
_ إيه ده .. إنتم قاعدين هنا تتودودوا لوحدكم يعني
_ تعالي يانور ..إقعدي ياختي ولا بنتودود ولا حاجة .. إحنا بس بنفكر في اللي جايين بالليل دول عندنا
_ تدفعولي كام لوقولتلكم مين هما ؟
_ إيه ده بجد تعرفي يانور
_ بت يافريدة .. خدي تعالي يامقرودة
_ نعم ياأبلة نور
_ مين اللي جايين بالليل ياقردة انتي
_ فيه مصاصة ولا مفيش ؟
_ أنا هجيبلك مصاصة يافريدة بس قولي
_ بجد ياأبلة حكمت هههههه شعرك حلو قوي ياأبلة
_ قولي والمصاصة هتجيلك .. وهخليلك شعرك زي شعري كده حلو وطويل
_ عارفة ياأبلة الناس جيرانا اللي عندهم دكان صغير بعدينا .. هما دول
_ اتبسمتي يعني يا حكمت
_ أبدا يانهى ..مافيش حاجة .. لماأقوم أنا أسرح شعري حاسة إنه مش عاجبني
_ نهى .. العريس كده جاي ل حكمت .. باينة زي الشمس خلاص
_ حسيت بكده برضو يانور .. ماهي برضو الكبيرة وحقها تتجوز قبلناطبعا .. وماما نفسها تفرح بيها الأول
_ فين المصاصة ياأبلة نهى
_ روحي لحكمت مش قالتلك هجيبهالك .. روحيلها بسرعة وخليها تسرحلك شعرك معاها يلا
.. طبعا وهو هيلاقي أجمل مني فين سي وديع ده كمان .. أكيد اتهوس بيا وبشعري اللي بقى طولي أصفر وزي الحرير .. وعيوني السود اللي بيجننوا
.. ليا حق أقول لنفسي ياكايداهم .. ياأجمل بنات الحته
_ يا حكمت .. تعالي عاوزاكي .. سيبك بقى من المرايا دي شوية يابنتي
_ حاضر ياأمي جاية أهو
.. نعم ياأمي خير .. عاوزاني أعملك إيه أؤمريني
_ طبعا أنا عارفة إنك حلوة وزي القمر.. طول عمرك واخدة بالك من نفسك .. بس بالليل إبقي إلبسي حاجة كويسة
_ حاضر ياأمي
.. وقضيت طول اليوم وأنا اهتم بنفسي وابتسامتي لاتكاد تفارقني .. وكانت المفعوصة فريدة تحوم حولي طول الوقت حتى بعد ماجبتلها المصاصة .. لحد ما سرحت لها شعرها ولبًستها أحلى حاجة عندها وظلت معي تتابعني وتحكي معي
_ عارفة ياأبلة حكمت .. أنا بحب قوي أبصًلك وإنتي واقفة قصاد المراية كده
_ وليه يعني بتعملي كده ياست فريدة
_ بحب ابتسامتك وانتي بتبصي لنفسك .. وبحس إنك زي الممثلين بتوع السيما .. هو إنتي ليه مش بياخدوكي في السيما معاهم
_ معرفش .. تقولي إيه بقى معندهمش نظر
_ هو أنا لماهكبر ياأبلة هبقى حلوة زيك كده
_ طول ماروحك حلوة .. وبتحبي النهار هتلاقي نفسك جميلة
_ يعني إيه ياأبلة أحب النهار ..
_يعني تصحي بدري كل يوم .. أول ماالشمس بتطلع بحب أبص للسما .. وبحب الهوا يلمسني ..واحضن أول ضي للشمس بعيوني وإحساسي
_ أنا مش فاهمة حاجة من كلامك ياأبلة خالص .. بس هصحى بدري كل يوم وياكي
_ يافريدة .. تعالي هنا وسيبي أختك شوية بقى
_ حاضر ياماما
.. أسيبك بقى تتذوقي ياأبلة هههههههههه
_ تعا ل ي أأقو لك ياف ري دة
_ نعم ياأبلة وزة
_ ما ل ها حك مت
_ كلام في سرك ياأبلة
_ قو قول لي
_ جايلها عريييس
_ وانا ..أأ نا مش ش جا ايلي حد
_ بكره يجيلك ياأبلة هههههههههه
.. بابا الحاج جه .. بابا جه
_ يابكاشة .. أنا اللي جيت برضو ولا الشيكولاته بتاعتك هههههه
_ إنت وهي ياحبيبي .. عديهالي بقى
_ خدي شيكولاتك أهي
.. أخبار إخواتك البنات إيه
_ عارف يابابا كلام في سرك ..أبلة حكمت من الصبح قصاد المرايا هههه
.. وأبلة وزة زعلانة عشان ماجالهاش عريس هي كمان
.. شفت أبلة حكمت سرحتلي شعري إزاي
_ بنت يافريدة .. سيبي أبوكي يرتاح شوية قبل ماالناس تيجي بقى
_ وليه ياماما .. ماإنتي عارفاها لازم الموجز اليومي تقدمه .. مش شايفاها أخدت الشيكولانة
_ طب يلا يانهى جهزي الغدا مع إخواتك بسرعة
_ أحضره معاهم ياماما
_ لأ سيبيهم وإبعدي عنهم شوية .. تعالي خليكي جمبي هنا
_ فين وزة ياحاجة مش شايفها يعني
_ جوة في الأوضة مع مفيدة وزينب .. تعالي ياوزة كلمي أبوكي
_ نع عم .. نع عم ياما ما .. إز زيك يابا با
_ عارفة ياوزة ياحبيبتي طيبة قلبك دي خلت راجل محترم يطلبك مني النهاردة
_ إ إيه .. ب بجد يابا با .. جا اني عر ريس ب بجد
_ أيوة ياحبيبتي .. تستاهلي كل خير يابنتي .. الأسبوع الجاي هيجي يزورنا مع أهله
_ أبلة أبلة نعمة .. فيه عريس لأبلة وزة كمان ههههههه عقبالي بقى
.. أبلة نهى .. أبلة نهى .. أبلة وزة جالها عريس
_ بس يابنت تعالي هنا
_ سيبيها ياحاجة تفرًح إخواتها
_ ماقولتليش ياحاج مين ده عريس وزة؟!
_ جدع محترم بيشتغل حلًاق بعدنا بشوية .. كان مرة فايت بيشتري سجاير من المحل عندي وكانت وزة نازلة جايبالي الشاي من كام يوم
_ وسمعها بتتكلم ياحاج ؟!
_ أيوة سمعها طبعا كانت بتكلمني .. طب إنتي عارفة .. بيقوللي عجبته وزة لماسمعها بتكلمني .. تُقل لسانها ده اللي لفت نظره وشدٌه ليها .. بيقوللي دي الست اللي بيتمناها .. حسًها طيبة وغلبانة
_ والله باين عليه بيفهم ياحاج
.. هو انت لسه ماشفتش حد يبنيلنا البيت ياحاج ؟
_ حد مين أشوفه بس .. أنا اللي هبنيه ياحاجة .. إحنا أولىً باللي هياخده المقاول
_ انت إيه بس ياحاج ..هو عشان اشتغلت شوية في المباني تبقى خلاص تبني .. البيت يعني حياة ناس مش حاجة سهلة ولابسيطة
_ سيبيها على الله .. أفوق بس من شغل المحل ومشاكل التموين أحسن الجماعة بتوع مباحث التموين فايقين علينا اليومين دول
_ هُمًا مالهم ومالك ياحاج
_ ماإنتي عارفة .. لوماعملتش اللي بعمله ده في التموين والسجاير يبقى مش هنكسب حاجة
_ إكسب بالمعقول ياحاج عشان ربنا يسترها معانا ومع بناتنا
_ المكسب اللي بيقولو عليه مش هنعرف نعيش بيه خالص وإحنا زي ماإنتي شايفة عددنا كبير
_ ماأنا ياما قُلتلك ياحاج زمان بلاش نعاند مع ربنا وإنت كنت مصمم نجيب الولد
_ كان نفسي يكون لي ولد ياحاجة
_ شفت بقى ربنا مش رايد لينا الولد أهو .. وعاقبنا بسبع بنات .. مش بنت ولا إتنين
_ يلا بقى خلاص مش هينفع الندم دلوقتي .. ولازم نكسب أكتر عشان عددنا ده
_ بس مانكسبش بالغلط ياحاج .. ربنا مش هيرحمنا أبدا .. وأكيد هنتعاقب في يوم من الأيام.. إحنا وبناتنا أكيد
_ ربنا يسترها ياحاجة
_ قوم يلا غيًر لبسك جوًة .. الناس على وصول
_ قايم أهو
_ يانهى .. هاتي عود بخور ولًعيه يلا
_ حاضر ياماما .. كله علشان ست حكمت .. كيداهم ههههه
_ إيه كيداهم دي يانهى ..
_ ماهي حكمت مسمية نفسها كيداهم هههههه إنتي ماتعرفيش
.. هو إنتي مش هتشوفيها قبل ماالناس يوصلوا ياماما
_ أشوفها ..؟! حكمت أكيد زي القمر .. طول عمرها واخدة بالها من نفسها .. مش زيكم
_ ماهي عشان كده مسمية نفسها كيداهم هههههههه
_ تسمي نفسها براحتها .. هي أصلا قمراية
_ وانا مش كيداهم ولا إيه ياماما
_ انتي ست البنات انتي روح قلبي .. وأجملهم كلهم
_ اسمعوا اسمعوا
_ لبست ياحاج ..؟
_ أناجاهز أهو ياحاجة
_ الجرس الجرس .. أفتح ياماما ؟
_ افتحي ياقلب ماما
_ اتفضلوا .. اتفضلوا .. أنا العروسة ههههه
_ طبعا عروسة ونص .. انتي فريدة .. ؟
_ أيوه .. وانت العريس وديع؟
_ بس يابنت .. ياأهلا وسهلا .. اتفضًلوا .. اتفضًلوا
_ أهلا بيكي ياحاجة ياست الكل
_ اتفضًل ياوديع يابني
_ مساء الخير ياطنط
_ السلام عليكم .. أهلا بيكم في بيتكم .. إتفضًلوا
_ وعليكم السلام .. إزيك ياحاج محمد ..
_ أهلا بيك ياأبو وديع .. إيه النور ده كله
_ يافريدة .. روحي خلي منى تجهًز الشاي
_ ياأبلة نهى .. أبلة نهى .. الشاي .. فين الشاي ياأبلة ؟
_ خلاص يامقرودة سمعت .. هوًينا بقى
_ أنا هروح لأبلة حكمت أتفرج عليها
.. أبلة حكمت .. أبلة حكمت
.. واااو .. إيه الحلاوة دي ياأبلة .. والله العريس ده محظوظ قوي
_ يافريدة ..
_ نعم ياماما
_ روحي إندهي حكمت
_ أبلة حكمت .. تعالي ياعروسة
.. شوفوا بقى الحلاوة كلها
_ ياأهلا ياأهلا بعروستنا القمر
_ إزيك ياطنط .. إزيك ياعمي
_ إيه يا حكمت .. سلًمي على سي وديع .. عريسك
_ إزيك ياسي وديع
_ إزيك ياكيداهم
_ إيه ده .. إنت عارف بكيداهم إزاي ؟!
_ المنطقة كلها ياطنط بتحلف بجمال ست حكمت طبعا
_ إيه كيداهم دي ياحاجة ماتفهمونا ؟!
_ حكمت ياحاج بتحب يكون اسمها كيداهم .. ههه .. وهي فعلا كيداهم بجمالها
_ وكيداهم كمان ياطنط بأخلاقها
_ سامعة ياأبلة نهى .. العريس بيقول لأبلة حكمت كيداهم إزاي
_ طب بس يامقرودة ياأم لسان طولك
_ عندك حق يابت يافريدة
.. فعلا حكمت زي القمر
_ حتى إنتى يا زينب .. طيب ياختي
_ هو إنتي مش بتحبي حكمت ليه يانهى ؟!
_ إيه ده بقى .. قوام يازينب خلتيني مش بحبها ؟!
_ ماهو كلامك دايما بيقول كده
_ أبدا .. بحبها طبعا .. بس ماما دايما بتفضًلها علينا
_ طب بس بس حكمت جاية
..إيه يا حكمت طلعتي وسيبتيهم ليه
_ أبدا يازينب ياحبيبتي جيت بس أشوف شكلي عامل إزاي .. الست أم وديع دي حاسة نكشتلي شعري وهي بتبوسني
_ إنتي زي القمر دايما ياأبلة حكمت ..
.. عارفة ياأبلة .. أنا شفت الست دي بتبصلك قوي
_ وأنا خُفت برضو من عينيها
_ عندك حق ياحكمت عين الست دي مش مريحاني خالص .. بتبص على بيتنا بطريقة تنرفز قوي
_ باين يانهى بيتهم مش حلو
_ هو أنتي هتعيشي معاها إزاي دي يا حكمت
_ ماتخافيش على أختك خالص .. أنا كيداهم
_ إيه يا حكمت يابنتي سيبتي الناس وقاعدة هنا مع إخواتك ليه كده
_ جاية أهو ياأمي
_ قوليلي بقى رأيك إيه في وديع يا حكمت
_ كل خير ياأمي .. اللي تشوفيه إنتي وأبويا الحاج
_ مبروك ياحكمت ياغالية .. عقبالكم يابنات كلكم
_ وعقبالي أنا كمان ياماما ؟
_ طبعا يافريدة .. ده إنتي قبلهم كمان
_ و وأن نا يا ما ما
_ طبعا ياوزة ياحبيبتي .. وانتي .. عريسك خلاص قرًب يجي
_ ب بج جد يا ما ما بج جد
_ مبروك ياأبلة وزة
_ ها ت تي بو وسة يار رو وح و وز زة
_ ياحاج .. خلاص ياخويا البنت موافقة ..قال إيه اللي تشوفيه إنتي وأبويا الحاج
_ مش برضوا ياحاجة زمان إنتي قلتي كده لأبويا الحاج لماسألك ..
_ أنا عارفة بقى يومها كنت قُلت إيه ياحاج ههههههه
_ نتكلم في التفاصيل ياأبو وديع
_ تفاصيل إيه ياحاج .. بنتكم بنتنا .. هتعيش معانا لحد ماوديع يقف على رجليه .. هنفرشلها أوضة وديع زي هي ماتشاور وعلى ذوقها طبعا .. وهنغير طقم الصالة بتاعنا عشان يناسب العروسة طبعا
_ ليكم طلبات تانية ياحاجة
_ تعيشي ياأم وديع كلك ذوق ياختي .. ماانتم قولتوها خلاص .. حكمت دي بنتكم .. بس سي وديع ماقالش هيجيب شبكة إيه
_ الشبكة اللي هتقول عليها حكمت ياطنط هجيبهالها
_ نقرا الفاتحة بقى ياحاج
_ وماله ياأبووديع .. نقرا الفاتحة على بركة الله
_ لولولولولولولولوي ههههههههه مبروك ..ألف ألف مبروك ياعروسة
_ ميرسي ياطنط
_ مبروك يا حكمت يابنتي
_ ربنا يخليك ليا ياأبويا وأقدر أفرًحك على طول
_ مبروك ياحبيبة قلب أمك تعالي في حضني ياغالية
_ مبروك ليكي ياأمي ياحبيبتي ربنا يسعدك دايما
_ مبروك ياحكمت.. يارب أقدر أسعدك
_ مبروك ياسي وديع هههههه
_ لولولولولولوي ههههه مبروك ياأبلة حكمت ..
_ مبروك ياروح قلب أبلة .. عقبالك يارب
_ يارب ياأبلة يارب ههههههههههه
_ ل ولو ل ولو ل ولو مب بر بروك يا ح كم مت
_ عقبالك ياوزة ياحبيبتي عن قريب ..
_لولولولولولولوي ...مبروك يا حكمت
_ عقبالك يانهى نفرح بيكي قريب بإذن الله
.. عقبالكم كلكم ياحبايبي
... وقضينا جميعا ليلة في منتهى السعادة حتى بعدما انصرف وديع وأسرته .. وبقينا طوال الليل نغني ونضحك معا .. ورأيت كيف كان أبي سعيدا ونظراته لاتفارقني .. فارتميت في أحضانه وقبًلته كثيرا
_ إيه ده بقى ياسي بابا .. أبلة حكمت هتاخدك مني ولا إيه هههههه
.. كفاية عليها عريسها .. تسيبك ليا بقى
_ ياحبيبة قلب بابا تعالي في حضني إنتي كمان
_ ههههه اتغاظوا .. اتغاظوا
... يااااه .. حاسة قلبي مش قد فرحتي النهاردة ..أخيرا ياكيداهم هتبقي عروسة .. أخيرا فيه راجل قدر يخطي نحية بيتنا ويدق بابنا ويطلبني ..
_ طب وأفرح ليه كده قوي يعني .. ده العادي ..ويحمد ربنا كمان إني وافقت عليه .. هو كان يحلم يعني يتجوز واحدة بجمالي
_ إنتي لسه صاحية يا حكمت
_ أيوة يانهى صاحية
_ طبعا الليلة ليلتك بقى .. ماحدش قدك النهاردة .. عروسة بقى هههه
_ طبعا ياأبلة وست العرايس أبلة حكمت
_ هو انتي لسه صاحية يامفعوصة ياام لسان طويل
_ سيبيها يانهى بحب كلامها قوي
_ شايفة ياأبلة نهى أخلاق العرايس .. ست النهار بتحبني إزاي ههه
_ وأنا مش بحبك ياست فريدة يعني ولا إيه بقى
_ إزاي بقى يانهى بتحبيها طبعا .. بس هي بتحب تهزر معاكي
_ مبروك ياحكمت ياختي ربنا يتملك على خير
_ عقبالك يانهى نفرح بيكي انتي كمان ياست البنات ياقمر
_ إنتي بس ست البنات ياأبلة حكمت ههههههههه
_ شوفي البت اللي عايزة تنضرب برصاصة في لسانها
_ إيه يابنات صاحين ليه لحد دلوقتي
_ هنام خلاص ياأمي
_ صحيني معاكي ياأبلة حكمت نحضن الشمس سوا هههههه
إلى اللقاء مع الحلقة 2
ليست هناك تعليقات:
إرسال تعليق